Подигнат еден од оштетените вагони со амонијак кај Пирот

Како што објави РТС, преостанатата содржина на амонијак денеска ќе биде безбедно отстранета од местото на несреќата. Дури потоа ќе се подигнат и последните три неоштетени вагон-цистерни со амонијак кои излетаа од пругата кај Пирот на 25 декември лани

Екипите на „Железници Србија“ и на Министерството за транспорт, со поддршка на работници и дигалки од „Бугарски железници“, вчера успеаја да подигнат еден од оштетените вагон-цистерни со амонијак кои на 25 декември минатата година излетаа од шините на пругата кај Пирот, јави РТС.

Како што објави медиумот, преостанатата содржина на амонијак денеска ќе биде безбедно отстранета од местото на несреќата. Дури потоа ќе се подигнат и последните три неоштетени вагон-цистерни.

Бидејќи се работи за најризичниот дел од оваа акција, Штабот за вонредни ситуации ги предупредил граѓаните да не се приближуваат на местото на несреќата, што го обезбедуваат голем број полицајци и пожарникари и спасувачи.

Автопатот Ниш-Пирот повеќе не е затворен за сообраќај.

Несреќата на пругата кај Пирот се случи на 25 декември минатата година кога четири од 20 вагони-цистерни кои пренесуваа амонијак излетаа од шините. По несреќата, во Пирот беше прогласена вонредна состојба, а повеќе од 50 лица беа хоспитализирани поради симптоми на труење.

По истекувањето на амонијак, прогласена вонредна состојба во Пирот

Министерството за градежништво, транспорт и инфраструктура на Србија формираше две комисии за утврдување на сите факти поврзани со несреќата на пругата Ниш – Димитровград кај пругата Пирот. Меѓутоа, министерот на тој ресор, Горан Весиќ, на 26 декември, ден по несреќата, изјави дека причината е лошата инфраструктура и дека не му треба комисија за да го утврди тоа.