Аргентинско-американскиот композитор Лало Шифрин, кој се прослави како автор на филмска музика, вклучувајќи ја темата од „Невозможна мисија“, почина на 93 години. Шифрин доби четири награди Греми и шест пати беше номиниран за Оскар, пред да му биде доделена почесна статуетка во 2019.
„Секој филм има своја сопствена личност. Нема правила во пишувањето филмска музика. Филмот диктира каква ќе биде музиката“, кажа Шифрин во интервју од 2018.
Тој ја напиша и музиката за шоуто на финалето на Светското фудбалско првенство во 1990 во Италија, кога првпат заедно пееја тенорите Лучано Павароти, Пласидо Доминго и Хосе Карерас.
Роден во еврејско семејство во Буенос Аирес, Шифрин беше и џез пијанист и диригент на класична музика и оствари исклучителна музичка кариера, при што работел и со џез великаните Дизи Гилеспи, Сара Вон, Ела Фицџералд и Каунт Бејзи.
За филм и телевизија напиша повеќе од 100 композиции, како „Валканиот Хари“, „Ладнокрвниот Лук“ и „Амитивилски ужас“, но остана најпознат по темата од серијата „Невозможна мисија“, што се емитуваше од 1966 до 1973, која потоа беше искористена и за филмскиот серијал со Том Круз.
ИЗВОР: sdk.mk
