Грција целосно го поддржува предлогот на Комисијата за укинување на минималниот износ од 150 евра, со што ќе се овозможи воведување царини за пратки со мала вредност кои потекнуваат од трети земји и влегуваат во границите на ЕУ, посочи министерот за национална економија и финансии на Грција Кирјакос Пиеракакис, јави дописничката на МИА од Атина.
По состаноците на Екофин и Еврогрупата во Брисел, Пиеракакис нагласи дека оваа политика е исклучително важна за транспарентноста на електронската трговијата, за заштитата на европските потрошувачи и за создавање рамноправни услови за европските бизниси.
– Би сакал да нагласам дека Грција целосно ја поддржува позицијата на Франција за спроведување на оваа мерка, барајќи итно спроведување, уште порано од предвиденото, од почетокот на 2026 година. Ова е исклучително важно прашање за царините на Европската Унија и за Унијата како целина, истакна Пиеракакис.
Претседателот на Грчката конфедерација за трговија и претприемништво Ставрос Кафунис, позитивно ја оцени европската одлука за воведување царини од првото евро за пратки од трети земји, нагласувајќи дека тоа дава „вистински оптимизам и за функционирањето на ЕУ и за перспективите за одржливост на европската и грчката трговија“.
– Внимателно ќе ги следиме следните чекори, особено разјаснувањето на точниот начин и времето на спроведување на новиот режим, како и дали одлуката ќе биде придружена со воведување административна такса, како што претходно објави Европската комисија, рече Кафунис.
Малите пратки од трети земји во Грција најчесто се од популарните кинески онлајн продавници „Шејн“ и „Тему“.
Онлајн изданието на грчкиот весник „Прото тема“, пишува дека со просечна вредност на пратките од околу 25 евра, вкупниот промет на мали пратки што пристигнаа во Грција минатата година се проценува на 627 милиони евра, износ што одговара на речиси 21 отсто од вкупниот онлајн пазар, кој се проценува на три милијарди евра.
Извор: vecer.mk
