Владата ќе има рок во наредните два месеца да одлучува за евентуално разрешување на раководството на Фондот за иновации, откако Антикорупциската комисија утврди нерегуларности во работењето. Пријавата што антикорупционерите ја разгледуваа се однесува за добиените грантови на две фирми во сопственост на внукот на Али Ахмети, Дрин Ахмети. ДКСК побара одговорност од директорот на Фондот, Управниот одбор и Комитетот за одобрување на инвестиции. Сега единствено се чека одлуката јавно да биде објавена.
„Владата треба да одлучи во рок од 60 дена дали ќе преземе конкретни мерки, бидејќи Државната комисија со иницијативата нема законски право да ја определува мерката, тогаш за утврдувањето одговорност се остава мерката да се определи од надлежниот орган, во овој случај Владата, која може да биде од опомена до разрешување, тука ДКСК не навлегува“, вели Нури Бајрами – поранешен член на ДКСК.
Според Бајрами, Фондот спорно овозможил проектите што ги работеле компаниите на Дрин Ахмети, Тхор индустриес и Еверест да го скратат времетрањето на реализација. Фондот тоа го одобрил иако немало законска можност за тоа. Воедно компаниите доцнеле или вооптшо не доставиле завршни извештаи, а Фондот не презел никакви мерки. Исто така Фондот не извршил ниту една теренска проверка за да види како тече реализацијата на проектите. Сепак, ова не било изолиран случај.
„Ние се придржавме до наводите во пријавата, а таа се однесуваше на двете фирми на Дрин Ахмети, но од податоците што ги добивме, ваквото работење не се однесувало само на доделувањето на грантови на овие две фирми, бидејќи и порано така се постапувало, според Правилник за инструментот за поддршка кој не е јасен и не е таксативно напишан согласно закон“, додава Бајрами.
Иновативните проекти на фирмите на Дрин Ахмети неофицијално се однесувале на 3Д моделирање и менаџирање со податоци. За Дрин не се бара одговорност, бидејќи не е службено лице. Фирмите Тхор индустриес и Еверест добиле пет милиони денари од огласот тежок шест милиони евра. Компанијата Еверест пак е со седиште во Соравија, каде Дрин Ахмети без вложен денар стана косопственик на трговскиот центар во центарот на Скопје.
Лука Андреев
Извор: alsat.mk
