Едниот пристигна со хеликоптер од Белград, другиот со полициска придружба од Скопје. Средбата се одржа на најфреквентната точка од Коридорот 10.
Додека министерот за внатрешни работи Панче Тошковски и неговиот српски колега Ивица Дачиќ го потпишуваа договорот за „One Stop“ во климатизирана просторија на Табановце-Прешево, на теренот продолжуваа долги редици возила и сирени на автомобили и камиони, и покрај тоа што новиот систем за заеднички влезни контроли веќе стапи на сила.
Српскиот министер Ивица Дачиќ изјави дека нема голема доверба во овој систем, но посака да функционира како што е планирано.
„Јас сум од таа генерација што немаше висока технологија и софистицирана техника, и понекогаш немам баш голема доверба во сето ова. Но, се надевам дека ќе функционира сè како што е замислено и дека ќе има што е можно помалку чекање на граничните премини, а граѓаните ќе бидат задоволни.“, вели Ивица Дачиќ.
Македонскиот министер Тошковски го увери својот колега дека ќе се забрза протокот на автомобили.
„На прашање на ТВ21 за граничниот премин Лојане-Миратоци, кој повеќе од 10 години е запоставен, министерот Дачиќ одговори дека не е направено ништо од ниту едната страна во однос на инфраструктурата за отворање на овој мал граничен премин. Додека судбината на Лојане-Миратоци сè уште е неизвесна, Македонија има уште еден заеднички премин Пелинце, каде засега не се планира воведување на „One Stop“, вели Панче Тошковски.
Денес беше потпишан и протокол за размена на полициски службеници по потреба во туристичките центри што се од заеднички интерес. Ова значи дека, на пример, во Охрид, за време на летната сезона, може да помагаат српски полицајци заедно со македонските колеги за одржување ред и мир, а по потреба македонски полицајци може да асистираат во Србија.
ИЗВОР: ТВ 21
