ОБЕДИНЕТИ НАЦИИ (АА) – Генералниот секретар на ОН, Антонио Гутереш, изрази загриженост дека Русија нема да го продолжи Договорот за жито преку Црно Море по крајниот рок на 17 јули, јавува Анадолу.
„Загрижен сум и работиме напорно за да се увериме дека ќе биде можно да се одржи Црноморската иницијатива и во исто време да може да продолжиме со нашата работа за олеснување на рускиот извоз“, изјави Гутереш на прес-конференција.
Договорот, првично потпишан во јули минатата година во Истанбул од страна на Туркије, ОН, Русија и Украина, имаше цел да го продолжи извозот на жито од украинските пристаништа. Овој извоз беше запрен поради конфликтот меѓу Русија и Украина што започна во февруари.
На 18 мај Договорот беше продолжен за дополнителни 60 дена, обезбедувајќи продолжување на извозот на жито според Договорот.
Русија бара отстранување на пречките за нејзиниот извоз на ѓубрива со цел да се согласи на уште едно продолжување на Договорот за жито, вклучително и вклучување на нејзината државна Руска земјоделска банка во меѓународниот платен систем СВИФТ.
Москва бара и обновување на извозот на амонијак преку Украина.
Не постојат западни санкции за рускиот извоз на храна и ѓубрива, но Русија вели дека банкарските ограничувања и плаќања влијаат врз нејзиниот извоз.
Извор: www.aa.com.tr
