ГАЗА (АА) – Агенцијата на Обединетите нации за помош и работа со палестинските бегалци на Блискиот Исток (УНРВА) објави процена дека 250.000 Палестинци ќе мора да побегнат од градот Кан Јунис на југот на Појасот Газа поради израелските напади, јавува Анадолу.
Тие истакнаа дека Палестинците во регионот „повторно“ се соочуваат со раселување и дека не постои безбедно место во Појасот Газа.
„Проценуваме дека 250.000 луѓе ќе мора да побегнат од Кан Јунис“, објавија од УНРВА.
Портпаролот на израелската војска Авичај Адраи вчера објави Палестинците итно да ги напуштат источните делови на Кан Јунис поради безбедносни причини.
Палестинците на истокот од градот беа принудени да мигрираат кон регионот Ал-Маваси неколку часа по повикот на израелската војска.
Ал-Маваси, кој се наоѓа на запад од Рафа и не е населба, има претежно отворени површини.
Раселените Палестинци се обидуваат да живеат во многу тешки услови во регионот што, исто така, нема инфраструктура, канализациони мрежи, далноводи, комуникациски мрежи и интернет.
Прекршувајќи ја Резолуцијата на Советот за безбедност на Обединетите нации со која се бара итен прекин на огнот, Израел се соочи со меѓународна осуда поради континуираната брутална офанзива врз Појасот Газа од нападот на Хамас на 7 октомври 2023 година.
Оттогаш се убиени најмалку 37.900 Палестинци.
По повеќе од осум месеци израелски напади големи делови од Појасот Газа се во урнатини, а влезот на храна, чиста вода и лекови во енклавата е блокиран.
Израел е обвинет за геноцид пред Меѓународниот суд на правдата, чија последна пресуда му наложи на Тел Авив веднаш да ја прекине воената операција врз јужниот град Рафа, каде што повеќе од еден милион Палестинци побараа засолниште од нападите.
Извор: Anadolu Agency (AA)
