Органодарителството во Македонија добива нов импулс со најавените законски измени според кои секој полнолетен и деловно способен граѓанин ќе може однапред да се изјасни дали сака по смртта да биде дарител на органи. Изјавата ќе се дава кај матичен лекар и ќе биде евидентирана во националниот електронски здравствен систем.
Целта на промените е одлуката за дарување органи да ја донесе самиот граѓанин додека е жив, наместо таа да остане исклучиво на семејството во момент на голема загуба и емоционален товар. Според најавите, личната волја на дарителот ќе има предност и ќе може во секое време да биде изменета или повлечена.
Во земјава потребата од трансплантации е значително поголема од бројот на достапни донатори, а многу пациенти со години чекаат шанса за нов орган. Затоа експертите сметаат дека покрај законските измени, неопходни се и поголема информираност, доверба во здравствениот систем и континуирана едукација на јавноста за значењето на органодарителството.
Извор: zurnal.mk
