Движењето ЗНАМ – За Наша Македонија ги отфрла информациите дека го побарале ресорот Министерството за одбрана, во рамки на коалициските преговори со ВМРО-ДПМНЕ. Од партијата тврдат дека такви разговори не се водат и дека владината коалиција е стабилна.
„Не е вистина дека го бараме Министерството за одбрана. Владиното мнозинство е стабилно, а сите забелешки и предлози се разгледуваат во рамки на работната група и во координација со премиерот“, велат од ЗНАМ во писмено соопштение до медиумите.
Движењето ЗНАМ најави и настап со свои листи на локалните избори, додека за кандидатурите за градоначалници со коалицискиот партнер ќе се договара поединечно, зависно од општината. За Куманово, партијата потврди дека ќе има свој кандидат.
„Во Куманово ќе одиме со наш кандидат за градоначалник. Партиските тела се во финална фаза на одлука кој ќе ја води кандидатската трка“, наведуваат од ЗНАМ.
Од таму додаваат дека ќе настапат транспарентно, со јасна програма и поддршка за реформите, водејќи се од интересот на граѓаните, а не од партиски калкулации.
ИЗВОР: ТВ 21
