Нов обид на помалите политички партии за промена на изборниот модел во една изборна единица со отворени листи. Претседателката на Либерално демократската партија Моника Зајкова за Тв21 изјави дека денеска го поднеле предлогот за измена на Изборниот законик во Собранието. Сепак како ќе се постигне консензус за овие измени, Зајкова вели дека доколку се отвори дебата се подготвени да прифатат и одредени сугестии кои би биле во рамките на концептот за една изборна единица.
„Во законското решение предлагаме една изборна единица, законското решение е пуштено без изборен праг, меѓутоа отворени сме да разговараме во однос на тој дел кога ќе се отвори дебатата, предвидува отворени листи за локалните избори затоа што навистина сметаме и покажаа сите овие работи кои што ни се случија во општеството дека ни треба директен избор од граѓаните“, рече Зајкова.
Премиерот Мицкоски уште во четвртокот на седницата за пратенички прашања повика да се направат измени на Изборниот законик со една изборна единица со што ќе се овозможи и гласање на дијаспората.
„Не сме седнале до сега да разговараме со никого на оваа тема, но принципиелно како ВМРО-ДПМНЕ, еве ќе повторам пратениците од пратеничката група на ВМРО-ДПМНЕ ние ќе поддржиме една изборна единица во кое што право ќе има да гласа и дијаспората“, вели Мицкоски.
И од ДУИ се согласуваат на една изборна единица но со праг од 5 проценти. Од оваа партија прашуваат зошто се уште не е формирана работна група на која би се дискутирало за измените на законот, кои треба да се носат 6 месеци пред одржувањето на изборите.
„Ние сме за една изборна единица, но со праг, минимален праг, а тоа значи 5 посто од излезноста, односно 3 посто од вкупниот број на избирачи на листата на избирачи и со отворени листи.“, изјави Арбер Адеми.
И од СДСМ велат дека се за отворени листи. Претседателот на партијата Венко Филипче деновиве порача дека неговата партија е подготвена да разговара за оваа иницијатива но рече дека таквите промени треба да бидат дел од поширока дебата во која ќе учествуваат сите политички партии. Покрај прашањето за една изборна единица, тука се и прашањата за цензусот и за отворените листи, рече Филипче.
ИЗВОР: ТВ 21
