Владата донесе одлука за проширување на намените на унгарскиот кредит од 250 милиони евра, кој првично беше насочен кон зголемување на производството, извозот и бројот на вработени. Сега, средствата ќе можат да се користат и за изградба на трговски центри и проекти за обновливи извори на енергија, изјави премиерот Христијан Мицкоски.
„Доколку не го направевме ова проширување, постоеше ризик дел од средствата да останат неискористени. Анализите покажуваат дека годишната потреба на економските оператори за заеми изнесува околу 250 милиони евра. Ограничувањата би значеле помала искористеност на средствата, што би било на штета на стопанството“, изјави Мицкоски при посетата на Петровец, каде што промовираше изградба на пат финансиран со дел од кредитот.
Иако првичните најави беа дека стопанството ќе ги добие парите до ноември, па до крајот на годината, потоа после празниците, ремиерот потврди дека договорите помеѓу Владата, Развојната банка и останатите банки се веќе подготвени и се очекува процедурата да биде завршена до крајот на месецот. Компаниите ќе можат да поднесуваат барања за финансирање веднаш потоа.
„Со проширувањето на намените, ги отвораме вратите за економските оператори да реализираат проекти кои ќе имаат позитивно влијание врз домашниот бруто-производ и македонската економија“, истакна Мицкоски, повикувајќи ги компаниите да подготват проекти и да аплицираат за финансирање.
Покрај овој кредит, Мицкоски се осврна и на повлечените 500 милиони евра од унгарскиот заем, кои беа наменети за рефинансирање на државните долгови. Според него, овие средства веќе се искористени за враќање на еврообврзницата од 2018 година.
Иако средствата од унгарскиот кредит беа првично планирани за финансирање на инвестиции во производствени капацитети, наменети за инвестиции во опрема, машини и фабрики, што би било корисно за развој на производството и создавање нови работни места, премиерот Христијан Мицкоски неодамна најави дека тие ќе можат да се користат и за изградба на трговски центри.
Со тоа се поставува прашањето дали на вистински начин ќе се искористат овие пари за развој на производството, а не за промоција на трговски и комерцијални интереси кои можеби нема да донесат директни економски бенефити за сите граѓани.
Според информациите на од банкарскиот сектор, фирмите парите ќе ги добијат на почетокот на февруари.
Фирмите кон банките ќе плаќаат каматна стапка од 1,95%, што ќе им овозможи на банките да ги покријат своите кредитни ризици, но сепак каматата од 3,25% што ќе биде плаќана кон Унгарија ќе биде покриена од буџетот, што значи дека и граѓаните ќе учествуваат во покривањето на трошоците за кредитот наменет за бизнисот.
ИЗВОР: racin.mk
