Опстанокот на Националниот парк Шар Планина се доведува во прашање. Системот за електронска наплата за влез на посетители на Шарскиот масив, кој требаше да биде основен приход на установата не е воспоставен.
Од Националниот парк за телевизија 24, изјавија дека Министерството за животна средина се уште не ги исплатило средствата од проектот „Инвестираме во Шара“ наменети за системот за наплата, но и изградбата на зелена инфраструктура.
Договорот за финансиска подршка е потпишан во мај, а во текот на летото требаше да се имплементира. Постапките околу подготовка на документација, јавни набавки, ги завршивме, но парите од министерството се уште ги чекаме, велат од паркот.
„Наплатата ќе се однесува на загадувачите (возилата) и субјектите кои ја користат природата за остварување приход, а локалното население кое живее во заштитеното подрачје е ослободено од плаќање влез во Националниот парк.Оваа компонента е исклучително важна за институцијата. Како што знаете Јавната Установа Национален парк Шар Планина иако е основана од државата, функционира со само-финансирање. Освен првичната финансиска поддршка за основање оваа година немаме добиено средства. Од наплатата на влезници ова лето ги очекувавме првите средства кои ќе покријат дел од трошоците за функционирање на институцијата. Практично за половина од вработените за следната година нема средства да се исплатат основни трошоци. Без нив се доведува во прашање опстанокот на Установа од национален интерес, вели Дехари.
Од Министерството за животна средина соопштија дека средствата наменети за Националниот парк Шар Планина како дел од проектот „Инвестираме во Шара“ ќе бидат наскоро исплатени.
„Во однос на реализацијата на проектот “Инвестирајте во Шара“ со кој ЈУНП Шар Планина аплицираше на јавниот повик за разспределба на средства од Програмата за инвестиции во животната средина на МЖСПП и доби средства во висина од 6 милиони денари, Ве информираме дека постапката за исплата е во тек. Во моментот се подготвува документацијата за исплата и средставата во најскоро време ќе бидат исплатени“, информираа од Министерството за животна средина.
Проектот “Инвестираме во Шара“ предвидува нови излетнички места, патокази, мостови, како и објекти за потребите на ренџерската служба на паркот. Целта е поголема заштитата на биодиверзитетот и равој на туризмот.
Извор: 24vesti.mk
