Во Градската општа болница „8 Септември“ во моментов се хоспитализирани 15 пациенти повредени во ужасниот пожар што се случи во Кочани. Од нив е планирано уште тројца да бидат испратени во странство.
Директорот, доктор Синиша Стојаноски ги посочи новите детали за бројот на хоспитализирани пациенти.
-Состојбата и утрово после утринскиот пресек е дека состојбата кај пациентите во однос на виталните параметри е стабилна. Во однос на тоа какви операции се изведуваат, тоа се операции кои заедно со тимовите кои се дел од помошта која дојде од специјализираните центри, станува збор за отстранување на изумреното некротично ткиво, оштетено од изгорениците и давање простор тие рани полека да почнат да зацелуваат. Треба да имаме предвид дека овие неколку денови не само што се мониторираше потенцијалното влошување на пациентите, туку мораа да се санираат и повредите на оние пациенти кои што не беа критични во прва фаза ниту беа во животозагрозувачка состојба. Тие неколку процеси на тријажа, мониторирање и прераспределба согласно тежината на нивната клиничка слика одеа паралелно, истакна тој.
Стојаноски посочи дека во континуитет се правеле преврски на раните, но и се гледало она ткиво кое е изумрено да се отстранува за раната да почне да заздравува.
ИЗВОР: kurir.mk
