Новата влада ќе биде формирана наскоро, рече првиот човек на ВМРО-ДПМНЕ Христијан Мицкоски во својот говор при прогласувањето на победата на изборите. Мицкоски рече дека бил и е во комуникација со лидерите на коалицијата Вреди за идната влада и рече дека ќе разговара и со други лидери на опозицијата, не прецизирајќи дали неговиот прв избор ќе биде „ЗНАМ“ или „Левица“.
Комуникацијата со Мицкоски ја потврди и лидерот на Беса, Билал Касами, од плоштадот во Тетово каде ги прославуваше изборните резултати.
„Само што имавме комуникација со претседателот на ВМРО. Веруваме дека штом го имаме првиот конечен резултат од Државната изборна комисија ќе седнеме и ќе разговараме за усогласување на владината програма во наредната 4-годишна влада и веруваме дека со оглед на бројките и сигурно мнозинство, веруваме дека идната влада ќе може многу брзо да се формира“, рече Касами.
На државата и треба стабилност, изјави со заканувачки тон лидерот на ДУИ Али Ахмети на прашањето дали неговата партија е подготвена да оди во опозиција, откако во неколку општини прогласи предност над Вреди. Ахмети го повика Мицкоски сега по кампањата да го остави фолклорот на страна и да размислува за мир во државата.
„Честитки за г. Мицкоски. Утре е 9 мај и да го оставиме фолклоризмот зад нас, да ја оставиме ароганцијата зад нас, и сите да размислуваме за стабилноста на државата, за иднината на државата затоа што само со рационалност можеме да гарантираме стабилност, мир во нашата земја. Нема да правиме непромислени потези… Ми се чини дека не ме разбравте кога кажав дека на државата и треба стабилност, и треба иднина, не треба да се прави математика… гласот на мнозинството во државата треба да се почитува и за ова треба сите да сносиме одговорност“, рече Ахмети.
Долго време се шпекулира дека другата преферирана коалициска опција на Мицкоски, покрај Вреди е партијата „ЗНАМ“ на Максим Димитриевски.
Фатлуме Дервиши
Извор: alsat.mk
