Штета е Македонија да увезува храна кога имаме услови за производство и потенцијал за извоз, истакна Васе Мојсовска, претседателка на Националната федерација на фармери, во изјава за МИА. Таа се осврна на предизвиците што ги донесе изминатата година и очекувањата за земјоделството во иднина.
– Оваа година беше исполнета со многу проблеми, особено поради големата суша што значително ги намали приносите кај многу култури. Во некои делови на земјата, од мај до ноември немаше капка дожд, а недостатокот на вода дополнително го влоши производството, рече Мојсовска.
Таа нагласи дека слабите приноси не се само удар за земјоделците, туку и за економијата на државата. Проблемите со климатските промени, кои ја погодуваат Македонија повеќе од 15 години, создаваат огромни загуби.
– Потребни се поголеми инвестиции во заштитни мрежи, анти-фрост системи, системи кап по кап и нови технологии за наводнување. Финансиската поддршка мора да биде брза и ефикасна, истакна таа, додавајќи дека субвенциите се особено важни кога пристигнуваат навреме.
Мојсовска ја поздрави исплатата на основните субвенции за 2024 година, кои ќе помогнат во подготовката за следната сезона. Таа апелира оваа практика да продолжи и во иднина, бидејќи само со навремена поддршка земјоделците можат да инвестираат и да го одржат производството.
Посебно внимание посвети на малите оператори на храна и семејните винарии, кои, според неа, можат да ја раздвижат руралната економија. Со поддршка во опрема и технологија, тие можат да прераснат во мали фабрики, да создаваат нови брендови и да вработуваат локално население.
Мојсовска подвлече дека Македонија мора да се фокусира на земјоделски производи со извозен потенцијал, да инвестира во младите во руралните средини и да обезбеди услови за нив да останат и да работат во земјоделството.
– Земјоделството има огромен потенцијал, но за успех е потребна координација меѓу сите чинители – земјоделците, откупувачите, државните институции, науката и локалните самоуправи. Само така ќе обезбедиме зголемено производство и помала зависност од увоз на храна, заклучи Мојсовска, честитајќи ги празниците со желби за здравје, среќа и успех за земјоделците.
ИЗВОР: racin.mk
