реклама
Претседателот на Европскиот совет Шарл Мишел, на неговото излагање на Бледскиот стратешки форум го постави тајмингот до 2030 година за Европската унија да биде подготвена за зачленување на други земји во Унијата. Со тоа тој испрати јасна порака за идното проширување.
„Ако сакаме да бидеме кредибилни, верувам дека мора да зборуваме за тајминг. Мора да зборуваме за нашите домашни задачи. И како сугестија, додека ја подготвуваме следната стратешка ЕУ- агенда, ние мора да си поставиме јасна цел. Верувам дека треба да бидеме подготвени од двете страни до 2030 за проширувањето.“, изјави Шарл Мишел.
На панелот на Бледскиот стратешки форум на кој се обратија лидерите од регионот. Премиерот Димитар Ковачевски рече дека и покрај песимизмот за проширувањето на ЕУ кој е присутен во многу земји на Западен Балкан, истакна дека е охрабрен од изјавата на Мишел, но и за блокадите за евроинтеграцискиот процес на Македонија.
„80 проценти од граѓаните на Северна Македонија се во корист на европската интеграција и проевропски ориентирани, а истовремено 80 проценти од граѓаните се против блокадите што доаѓаат една по друга. А овие блокади доаѓаат од земји членки на Европската унија во бранови кои што се користат главно за нивната домашна политика а не за меѓународната сцена.“, изјави Ковачевски.
По Ковачевски се обрати и новоизбраниот бугарски премиер Николај Денков кој праша зошто е проблем да се внесат Бугарите во македонскиот устав.
„Секој вели на бугарска страна – зошто ги запирате поради измените на Уставот? Да поставам друго прашање. Зошто би имало проблем Бугарите да се внесат како дел од листата на 10 народи што се вклучени или треба да бидат вклучени во Уставот во Македонија. Ова не е мој личен проблем туку политички проблем и овој политички проблем е дел од преговорите меѓу Северна Македонија и Европската унија.“, рече Денков.
Албанскиот премиер Еди Рама пак изрази песимизам и за членството во ЕУ до 2030 година.
„Ако она што го кажа Шарл ќе се реализира во смисла на реални чекори напред, не дека јас верувам дека во 2030 ќе бидеме членки на Европската унија но барем некој од чекорите да се реализираат што ќе биде многу добро.“, вели Рама.
Оптимизам дека ќе има напредок и еден ден ќе бидат членка на Европската унија истакна и премиерот на Косово Албин Курти. Тој воедно ги повика и другите членки на Европската унија да го признаат Косово.
„Ние сме оптимисти во однос на иднината и очекуваме поголема соработка и приклучување кон Европската унија не само да имаме корист од неа туку и да дадеме придонес во Западен Балкан. Може да кажеме дека Европската унија е еден вид секуларна религиија. Мислам дека тоа ниту погрешно ниту лошо.“, рече Курти.
На панелот говореа и премиерите на Хрватска Андреј Пленковиќ, на Србија Ана Брнабиќ, на Црна Гора Дритан Абазовиќ и на Босна Борјана Кришто.
реклама
реклама
