Само две земји во светот имаат доволно ресурси и енергетска независност за да водат војна без помош од други – Соединетите Американски Држави и Русија, изјави хрватскиот претседател Зоран Милановиќ.
– Тие велат, на пример, дека Русија е изолирана. Јас отсекогаш сум бил скептичен. Никогаш не сум имал деловни или политички односи со нив, бидејќи се далеку. Подобро е да се работи со конструктивни односи со соседите – Србија, Унгарија, Словенија… Русија е далеку. А кој ги изолираше? Од сите луѓе во светот, само 12 проценти живеат во земји кои им воведоа санкции. Останатите 88 проценти не можат да доживеат да нè видат. Нè мразат. Нè сметаат за експлоататори и бандити кои ја наметнуваат својата волја и економски интереси преку „демократија“, а во исто време им даваат лекции на другите – рече Милановиќ, пренесуваат хрватските медиуми.
„Самиот Запад го создаде сојузот на Русија и Кина“
Милановиќ оцени дека, како што рече, „брилијантните стратези на Западот“ успеаја да постигнат она што претходно изгледаше невозможно – да ги зближат Москва и Пекинг.
– Сега имаме две од најопасните земји во светот, кои ние самите ги спријателивме, наместо да бидеме на дистанца една од друга. Наместо Русија да се држи на дистанца од Кина, тие сега се во сојуз благодарение на нашите потези – истакна хрватскиот претседател.
Изјавата на Милановиќ предизвика бројни реакции во Хрватска и во регионот, бидејќи уште еднаш укажува на неговата долгогодишна критика кон западните геополитички одлуки и политиката на санкции против Русија.
Кисинџер го зборува тоа со децении
Во големото интервју што Хенри Хисинџер пред неговиот стоти роденеден им го даде на тројца новинари на лондонскиот магазин „Економист“, помеѓу останатото, поранешниот државен секретар на САД, и според многумина највлијателен дипломат во светот во 20-тиот век изјави:
“Русија и Кина не се природни сојузници. Во руската или во кинеската историја не можете да најдете лидери кои се залагале да ја засноваат својата политика на сојузи меѓу себе
Не е мудро да кажеме дека сакаме да ги одвоиме Русија од Кина – но тоа е нешто што треба да го имаме на ум. А предуслов за тоа е, пред сè, да не се уништи Русија целосно во војната.
И по војната, можеме да го прогласиме нејзиното (Руско) членство во Европа за важна цел. Иако ќе биде невозможно – и разбирливо – да се натераат источноевропејците лесно да се согласат на такво нешто.
Кисинџер со децении застапува идеја на зближување на Европа со Русија како пат до дистанцирање од цврсти сојузи со Кина што е стартешка закана за интересите на САД и Европа. Дипломатската академија на Министерството за надворешни работи на Русија на Хенри Кисинџер му има доделено статус почесен доктор на науки.
Поранешниот државен секретар на САД и добитник на Нобелова награда за мир, Хенри Кисинџер, стана академик на Руската академија на науките во 2016-та година заедно со уште шест странски добитници на Нобелова награда, тоа го соопшти академикот Борис Четверушкин, објавувајќи ги резултатите од гласањето за избор во Руската Академија на науките.
Во свечената сала на Академијата во Москва Кисинџер одржа говор и изјави дека дури и во новите времиња, секоја држава треба да го зачува својот национален карактер, да не ја заборави својата историја и да не се откаже од своето наследство.
На крајот од предавањето, тој рече дека САД, Русија и Кина не треба да претставуваат закана една за друга, туку – со доаѓањето на новата ера и новите предизвици – да ги преиспитаат своите способности и улоги во светот и да работат заедно во име на заедничките цели. Значи, ниту униполарен ниту мултиполарен свет, туку триаголник на САД-Русија-Кина, прилагоден за модерната ера во неовестфалски свет.
Извор: vecer.mk
