Денес во Лондон ќе се потпише стратешкиот договор помеѓу Северна Македонија и Обединетото Кралство, договор во вредност од 6 милијарди евра. Првиот заменик-премиер на Северна Македонија, Изет Меџити, по средбата во Лондон со претставници на Инструментот за поддршка на надворешно финансирање на Обединетото Кралство – UKEF, изјави дека договорот за стратешко партнерство со Обединетото Кралство решава витални проблеми за граѓаните на Северна Македонија. Тој додаде дека договорот опфаќа инфраструктурни проекти, како и проекти во здравството, образованието и транспортот, а ќе придонесе и за заштитата на животната средина.
„Во областа на образованието и здравството се предвидува изградба на нова болница во Кичево, реконструкција на болницата во Тетово, како и изградба на Медицински факултет во истиот град. Исто така, во Штип се планира реконструкција на болницата и изградба на Медицински факултет,“ изјави Меџити за ТВМ.
Тој додаде дека за време на средбите се дискутирало и за нова идеја од Министерството за животна средина за искористување на оваа финансиска можност, како и британската експертиза и искуство за отстранување на опасниот отпад кој со децении претставува закана за животната средина и јавното здравје во земјата.
„Посебен фокус беше ставен на чистењето на опасниот отпад како што е линданот во фабриката ОХИС, во Југохром, во Ваксинце и Лојане, кои претставуваат потенцијална закана за целата држава,“ потенцираше Меџити.
Тој го оцени ова како значаен чекор во продлабочувањето на соработката помеѓу Северна Македонија и Обединетото Кралство, не само на економски и инвестициски план, туку и на политички план.
