Макрон се огласи на социјалните мрежи за да каже дека детално разговарал за ситуацијата на Блискиот Исток со Трамп. „Ги пофалив решителните напори што ги предводи за постигнување договор меѓу САД и Иран што е можно поскоро. Ова претставува единствена можност за изградба на нова безбедносна рамка што ќе ги вклучи сите заинтересирани страни и ќе овозможи трајна стабилизација на регионот“, напиша францускиот претседател.
„Меѓународна мисија подготвена за распоредување на терен“
Макрон нагласи дека Париз нема намера да молчи, но е подготвен да преземе оперативна улога на терен штом ќе се постигне договор меѓу Вашингтон и Техеран.
„Изјавив дека сме подготвени целосно да ги поддржиме овие напори и да го преземеме нашиот дел од одговорноста во нивното спроведување. Токму ова е целта на меѓународната мисија што ја дизајниравме заедно со Британците и нашите партнери. Таа е подготвена да се распореди штом ќе се склучи договор за да се придонесе за безбедноста на поморскиот сообраќај во Ормутскиот теснец“, откри Макрон.
Тој исто така додаде дека Франција е подготвена да ја понуди својата експертиза и воени капацитети во пошироките преговори што мора да се отворат, со посебен акцент на нуклеарниот аспект на договорот. Конечно, тој ја пофали посветеноста на Трамп на суверенитетот и територијалниот интегритет на Либан, нагласувајќи ја важноста на цврст прекин на огнот и колективна поддршка за либанските власти.
За потсетување, Франција вчера побара итен состанок на Советот за безбедност на ОН поради драматичното интензивирање на израелската офанзива во Либан, а оваа вонредна седница ќе се одржи подоцна денес.
Извор: vecer.mk
