Градоначалникот на Општина Бутел и кандидат на ВМРО-ДПМНЕ за втор мандат, Дарко Костовски, преку објава на социјалните мрежи направи биланс на првите четири години од неговото раководење, потенцирајќи ги конкретните резултати и промените кои ги донесе во оваа општина.
Костовски нагласи дека за првпат по децении, Бутел добил сериозни инвестиции во инфраструктурата, со асфалтирање на вкупно 102 улици во вредност од 320 милиони денари, проект кој суштински го променил животот на граѓаните.
„Изминатите години беа исполнети со работа, посветеност и конкретни реализации. Ветив пред граѓаните на Бутел и денес, по четири години, можам гордо да кажам дека ветувањата се исполнуваат, а нашата општина се менува секој ден,“ изјави Костовски.
Според него, инвестициите во Бутел никогаш досега не се случиле во ваков обем, со што општината се претвора во помодерно, пофункционално и подобро место за живеење.
Костовски исто така истакна дека Бутел е „нашиот дом, нашата сегашност и наша иднина“, повикувајќи ги граѓаните да ја продолжат патеката на започнатиот развој и да го поддржат неговиот втор мандат.
„Продолжуваме заедно со вас да ја градиме и развиваме нашата општина во модерно и подобро место за живеење. Нашите улици се доказ за нашата работа. Заокружете број 9 за сигурна иднина,“ заврши Костовски.
