Косовскиот премиер Албин Курти го оцени денешното потпишување на Договорот за слободна трговија меѓу Косово и земјите членки на Европската асоцијација за слободна трговија (ЕФТА) како пресвртница во подобрувањето на економските односи и трговската соработка со земјите-членки на ЕФТА.
Тој изрази длабока благодарност до сите членки на ЕФТА за нивната блиска соработка во текот на преговарачкиот процес, пренесе Бета.
– Договорот што го потпишуваме денеска воспоставува рамка за трговски односи меѓу Косово и земјите од ЕФТА и отвора нови можности, дозволувајќи му на Косово пристап до нивните пазари, рече Курти.
Тој додаде дека договорот носи значителни предности за косовските компании, кои сега ќе имаат можност да извезуваат на пошироки пазари, а со тоа дополнително да се интегрираат во европскиот економски систем.
ЕФТА е меѓувладина организација создадена за промовирање на слободната трговија и економската интеграција меѓу земјите-членки.
Основана е во 1960 година како алтернатива на Европската унија (тогаш Европската економска заедница). Во моментов, ЕФТА има четири земји-членки – Исланд, Лихтенштајн, Норвешка и Швајцарија. (МИА)
Извор: kurir.mk
