БОГОТА (АА) – Претседателот на Колумбија, Густаво Петро, синоќа најави дека во Обединетите нации (ОН) ќе поднесе предлог за признавање на Палестина како целосно независна држава, известува Анадолу.
Петро, на својот профил на социјалната мрежа Х, сподели снимка од жртвите на израелскиот напад на болницата Ал Шифа во блокираниот Појас Газа.
„Ова е масакрот во болницата Ал Шифа што го започна премиерот на Израел, Бенјамин Нетанјаху. Колумбија ќе поднесе предлог до ОН за признавање на Палестина како целосно независна држава“, вели Петро во пораката.
Тој најави дека Колумбија нема да купува оружје од земји што гласале против или биле воздржани на гласањето за барањето прекин на огнот во Газа.
„Демократските и прогресивните земји мора да се борат да го спречат ширењето на варварството во светот и да го заштитат хуманитарното право“, порача колумбискиот претседател Петро.
