Зголемувањето на платите на наставниците во основното и средното образование и понатаму неизвесно. Отворени сме за дијалог со Самостојниот синдикат за образование, наука и култура, ќе разговараме со сите социјални партнери и секако дека ќе бараме начин да ги измотивираме наставниците на сите можни начини, порача министерката за образование и наука Весна Јаневска, денес од Штип.
Дека државната каса е испразнета и нема пари за покачување на платите во образованието, Јаневска кажа и вчера, но од СОНК велат дека, по Закон на наставниците им следува 12 проценти зголемување на платите, со што се надеваат на позитивно решение до средината на следниот месец.
И додека надлежните си ја подаваат топката, секојдневно се соочуваме со дефицитарен кадар и немотивирани просветни работници. Дека проблемот е комплексен, потврди и Јаневска, бидејќи, како што кажа, во одредени општини има вишок на наставници, а во одредени пак, има недостиг.
Инаку, за седум години, во државата има 16 илјади ученици помалку, а бројката на првачиња се намалила за над три илјади.
Извор: 24vesti.mk
