ГАЗА (АА) – Куќата на Јасер Арафат, поранешниот палестински претседател, кој одигра голема улога во палестинската борба против повеќедецениската израелска окупација, уништена е во израелските напади врз градот Газа, известува Анадолу.
Куќата во која Арафат живеел шест години била цел на израелските сили. На куќата што фондацијата „Јасер Арафат“ ја претвори во музеј е предизвикана голема материјална штета.
Во 2002 година израелските власти го ставија Арафат во домашен притвор во Рамала на окупираниот Западен Брег. Комплексот, во кој се наоѓа и седиштето на палестинските власти, две години беше под опсада на израелските сили.
Арафат се разболи во 2004 година, при што беше објавено дека боледува од грип, но тој никогаш не оздрави. Во октомври 2004 година беше пренесен на лекување во Франција, каде што почина на 11 ноември.
Поради израелската окупација, волјата на Арафат да биде погребан во Ерусалим не беше исполнета, но тој беше погребан во Рамала. Постојат теории што укажуваат на сомнение дека Арафат бил отруен.
Извор: Anadolu Agency (AA)
