Израелски медиум: Атентатот на Ханије во Техеран е извршен со поставена бомба во неговата соба

КУДС (ЕРУСАЛИМ) (АА) – Приватен израелски медиум во истражувачки извештај објавен доцна синоќа, откри нови информации за атентатот на Исмаил Ханије, поранешен шеф на Политичкото биро на Хамас, по укинувањето на цензурата од страна на владата за случајот, тврдејќи дека во неговата соба била поставена бомба, пренесува Анадолу.

Ханије беше убиен во неговата резиденција за време на посетата на Техеран, главниот град на Иран, на 31 јули.

Атентатот е извршен со „прецизна бомба“ поставена во собата на Ханије и контролирана од далечина, се вели во извештајот на Канал 12.

Се додава дека уредот бил поставен по церемонијата на инаугурација на новиот претседател на Иран, Масуд Пезешкијан.

Според истрагата на медиумот, подготовките за операцијата вклучувале прецизен надзор на движењата на Ханије со цел да се осигура дека тој останува во одредена просторија во повеќе наврати.

Операцијата се соочила со голем предизвик кога климатизацијата во собата на Ханије престанала да функционира, што ја зголемило можноста тој да биде преместен на друго место. Сепак, тим за одржување го решил проблемот, овозможувајќи да се продолжи со планот, се тврди во извештајот.

Канал 12 објави дека планирањето на операцијата траело со месеци, а неименувани извори ја опишуваат мисијата како „една од најкомплексните и најсензитивните операции“, тврдејќи дека Ханије играл клучна улога во планирањето напади врз Израел.

На 23 декември, израелскиот министер за одбрана, Израел Кац, ја призна одговорноста на Израел за атентатот на Ханије.

Признавањето на Кац, според израелските медиуми како „Једиот Ахронот“ и Канал 12, го означува првото јавно признание за операцијата од страна на висок израелски претставник.

Израел продолжува со геноцидната војна врз Газа во која досега се убиени речиси 45.500 Палестинци, повеќето жени и деца, која ја започна по нападот на палестинската група Хамас на 7 октомври 2023 година.

Минатиот месец, Меѓународниот кривичен суд издаде налози за апсење на Нетанјаху и поранешниот министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата поради неговите постапки во Газа.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.