Израелската војска уби Палестинец на Западниот Брег, бројот на убиени порасна на 325

РАМАЛА (АА) – Палестинското Министерство за здравство денес објави дека е убиен Палестинец од огнено оружје од страна на израелската војска во Тамун, во северниот дел на Западниот Брег, пренесува Анадолу.

Во соопштението на Министерството се наведува дека Асид Џавад Матар Бани Одех (29) бил убиен откако израелската војска го застрелала во градите.

Очевидци за Анадолу изјавија дека војската влегла во Тамун во близина на Тубас, и започнала со претреси и рации во домовите, што довело до судири со десетици Палестинци.

Тие споменаа дека за растерување на Палестинците била користена боева муниција.

Според податоците на Министерството за здравство, бројот на палестински жртви на Западниот Брег, вклучително и во Источен Ерусалим (Источен Кудс), се искачи на 325.

Од 7 октомври, израелските напади на Западниот Брег ескалираа истовремено со разорната војна во Газа, во која заклучно со вчера загинати се вкупно 22.313 Палестинци, а 57.296 се повредени, од кои главно деца и жени.

Според властите во Појасот Газа и Обединетите нации, конфликтот предизвика и голема штета на инфраструктурата и голема хуманитарна катастрофа.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..