КУДС (АА) – Израелската Армија денес соопшти дека дозволила влез на осум камиони со гориво и гас во Појасот Газа преку граничниот премин Рафа, како дел од договорот за хуманитарна пауза со кој привремено запреа засилените напади на Израел против Газа, пренесува Анадолу.
„4 танкери со гориво и 4 танкери со гас за готвење беа префрлени од Египет до организациите за хуманитарна помош на ОН во јужниот дел на Појасот Газа преку преминот Рафа“, се вели во соопштението на Канцеларијата за врски на Армијата со Палестинците, позната како Координатор на владините активности на териториите (COGAT).
„Горивото и гасот за готвење се наменети за функционирање на основната хуманитарна инфраструктура во Газа“, се додава во соопштението.
Влезот на камионите со гориво беше одобрен од израелската Влада како дел од хуманитарната пауза и договорот за размена на затвореници, што се очекува да се случи подоцна во текот на денот, соопшти Канцеларијата за врски.
Од 7 октомври, израелската Армија изврши задушувачка опсада на Газа за време на која на камионите со гориво им беше забранет влезот во енклавата.
Откако почнаа немилосрдните напади на Израел на 7 октомври и неговата опсада ги намали залихите на хуманитарна помош, агенциите на ОН во Газа, особено Агенцијата на ОН за помош и работа за палестинските бегалци на Блискиот Исток (UNRWA), добија само многу мали количини гориво, критично за нивното континуирано работење.
Четиридневната хуманитарна пауза меѓу израелската Армија и палестинската група Хамас стапи на сила утринава во сите области на Појасот Газа, привремено запирајќи ги нападите за да се направи размена на затвореници и да се достави помош.
Израел започна немилосрдни воздушни и копнени напади во Појасот Газа по нападот на Хамас, при што загинаа повеќе од 14.854 Палестинци, вклучувајќи 6.150 деца и над 4.000 жени, според здравствените власти во енклавата.
Бројот на загинати во Израел изнесува околу 1.200, соопштија израелските власти.
