ГАЗА (АА) – Десетици Палестинци загинаа во новите израелски воздушни напади врз Појасот Газа извршени рано утринава, објави државната палестинска новинска агенција Вафа, пренесува Анадолу.
Борбен авион погодил куќа во Хан Јунис, јужно од градот Газа, при што загинале три лица, меѓу кои и едно дете. Се истакнува дека неколку луѓе се заробени под урнатините.
Во друг напад погодена е куќа во централниот град Деир ал Балах, при што загинати и повредени се најмалку 15 лица.
Десет лица загинаа и има повредени во израелски воздушен напад врз куќа во подрачјето на Заваида во централниот дел на Појасот Газа.
Исто така, во израелски воздушен напад гаѓана е куќа во бегалскиот камп Тел ал-Султан, западно од Рафа во Јужна Газа.
Израел започна воздушни и копнени напади врз Појасот Газа по прекуграничниот напад на Хамас на 7 октомври.
Во конфликтот досега загинаа над 11.300 луѓе, од кои најмалку 9.770 Палестинци и речиси 1.600 Израелци.
Покрај големиот број жртви и масовното раселување, основните резерви се при крај за 2,3 милиони жители на Газа поради израелската опсада.
