АТИНА (АА) – Ирска денес соопшти дека ќе биде една од предлагачите на резолуција на Советот за безбедност на Обединетите нации (СБОН) за хуманитарен прекин на огнот во Газа, јавува Анадолу.
Резолуцијата ќе бара итен хуманитарен прекин на огнот, заштита на цивилите и почитување на меѓународното право, итно и безусловно ослободување на заложниците и итен пристап на хуманитарната помош, соопшти ирскиот министер за надворешни работи Мајкл Мартин преку платформата Х.
„Советот мора да дејствува“, нагласи тој.
Израел ја продолжи својата воена офанзива против Појасот Газа на 1 декември по завршувањето на еднонеделната хуманитарна пауза со палестинската група Хамас.
Најмалку 17.177 Палестинци загинаа, а над 46.000 се повредени во немилосрдните воздушни и копнени напади врз енклавата од 7 октомври по прекуграничниот напад на Хамас.
Според официјалните податоци, билансот на загинати во Израел, во нападот на Хамас, изнесува 1.200.
