Цела ноќ „Мостот на слободата“ во Нови Сад остана блокиран, а студентите спиеја во шатори. Денеска, студентите ги чистеа раскрсниците, булеварите и парковите каде што синоќа се одржа голем собир. Студенти на три новосадски факултети, со поддршка на своите колеги кои пеш пристигнаа од Белград, ги блокираа трите моста во Нови Сад, на денот кога поминаа три месеци од несреќата кај железничка станица во која загинаа 15 лица.
Славица Николиќ: „Не можам да замислам да не поддржам нешто што се гледа од прва дека е позитивно и после долго време една добра енергија коај се чувствува во воздухот, на улиците и меѓу луѓето. Ова сега е конечно надеж дека нешто добро ќе се случи“.
Студентскиот парламент на Факултетот за хуманистички науки во Копер, Словенија денеска ги поддржа студентите од Србија кои протестираат и им порачаа дека не се сами, туку дека со нив се и нивните колеги од Словенија. Барањата на студентите за прекин на блокадите вклучуваат објавување целосна документација за реконструкција на железничката станица во Нови Сад, за утврдување одговорност за несреќата од 1 ноември 2024 година. Тие бараат и напаѓачите на демонстрантите ширум Србија, за време на протестите кои следеа по несреќата, да бидат идентификувани и да се соочат со кривична одговорност. Барањата вклучуваат и ослободување на активистите уапсени за време на протестите, прекин на кривичната постапка против нив и зголемување на буџетот за универзитетите. Во меѓувреме, Министерството за градежништво, транспорт и инфраструктура на Србија, соопшти дека целата документација е објавена и достапна на веб-страницата на Владата на Србија, а е поврзана и со уривањето на настрешница на главната железничка станица во Нови Сад.
Извор: 24vesti.mk
