Генералштабот на војската на Србија бара враќање на задолжителниот воен рок

Задолжителниот воен рок во Србија беше укинат на 1 јануари 2011 година и оттогаш во војска одат само оние што доброволно ќе се пријават. Темата за повторно воведување на задолжителен воен рок не е нова во изјавите на српските функционери

Генералштабот на српските вооружени сили покрена иницијатива и му предложи на претседателот на земјата Александар Вучиќ, како врховен командант, повторно да се воведе обврската за служење на воен рок до четири месеци, соопшти денеска Министерството за одбрана на Србија, јавуваат тамошните медиуми.

Целта е, како што се наведува, да се подигнат одбранбените способности на српските вооруженин сили, преку подмладување и подобрување на пополнувањето и обуката на активните и резервните сили, пренесува регионалниот сервис на Радио Слободна Европа (РСЕ). 

 „Предлогот на Генералштабот на српските вооружени сили доаѓа по детално разгледување на општата безбедносна ситуација и современите предизвици со кои се соочува Србија како воено неутрална земја, што ја наметна потребата од прилагодување на моделот на регрутирање на армијата, што ќе овозможи зајакнување на севкупниот регрутен потенцијал и обука на поголем број граѓани за одбрана на нашата држава“,

се наведува во соопштението на Министерството за одбрана на Србија.  

Ресорниот министер Милош Вучевиќ говорејќи на темата најави почеток на парламентарна процедура за поништената одлука за прекин на задолжителната воена служба и ревизија на законот со кој се регулира оваа обврска. 

Вучевиќ денеска во гостување на ТВ Хепи изјави дека иницијативата се покренува врз основа на проценка на безбедносната состојба во земјата, додавајќи дека многу европски земји повторно ја активираат обврската за служење воен рок.  

Тој изјави дека во Србија 13 години немало задожителен воен рок и дека сега армијата на земјата има потреба од пополнување на резервниот персонал.  

„Имаме 13 генерации каде немаше задолжителен воен рок, 13 генерации ја напуштија резервата на српските вооружени сили. Нашите одбранбени и безбедносни потреби се да имаме нови регрути и нов состав, кој секогаш е подготвен да ја заштити земјата. Тоа не значи дека се подготвуваме за конфликти или дека некои војни се на хоризонтот“,

рече Вучевиќ. 

Задолжителниот воен рок во Србија беше укинат на 1 јануари 2011 година и оттогаш во војска одат само оние кои доброволно ќе се пријават. 

Темата за повторно воведување на задолжителен воен рок, како што забележува РСЕ, не е нова во изјавите на српските функционери.  

Претседателот на Србија Александар Вучиќ за враќањето на обврската зборуваше во 2022 година, а една година претходно, за тоа говореше и тогашниот министер за одбрана Небојша Стефановиќ. 

Инаку, српските власти во своите јавни настапи и понатаму нагласуваат дека Србија нема намера да се приклучи на Северноатлантската алијанса – НАТО и една од ретките земји од регионот на Западен Балкан која не сака да стане дел од воениот блок.  

Во случај српските власти да олучат да го вратат воениот рок, Србија ќе биде меѓу ретките земји во Европа, како Шведска, Литванија или Грузија, кои ја укинаа, а потоа повторно ја воведоа оваа обврска.  

Европски земји кои не го укинаа задолжителниот воен рок се Швајцарија, Норвешка, Данска, Финска, Австрија, Турција, Естонија, Русија, Белорусија, Украина, Грција и Кипар, наведува РСЕ.