Неподнослива миризба, преполни контејнери и расфрлан отпад на сите страни – втор ден Скопје се дави во ѓубре. Вработените во „Комунална хигиена“ протестираат и одбиваат да работат, а раководството на претпријатието нема решение како ќе се реши проблемот додека трае штрајкот.
Сликата со преплавени контејнери и смет на околу е речиси идентична во сите скопски населби.
Граѓаните стравуваат од ширење на зарази, а дел од градоначалниците на скопските општини реагираа дека единствено одговорност за проблемот има ЈП „Комунална хигиена“ и Градот Скопје.
„Насекаде гледаме полни контејнери, а сите ние, граѓаните ја трпиме штетата од неумесното и неодговорно менаџирање со јавното претпријатие. Преполните контејнери смет и лошиот мирис кој се шири во општината е одговорност на Градот Скопје и Јавното претпријатие „Комунална хигиена“. Граѓаните одговорно и навремено ја плаќаат комунална такса и тие заслужуваат чиста и средена општина. Токму поради тоа апелираме до надлежните, да ја тргнат политиката на страна и итно да изнајдат соодветно решение за собирање на сметот во општина Аеродром“
велат од Општина Аеродром.
Реакција за проблемот со отпадот стигна и од Општина Центар, од каде побараа итно решени од градските служби.
„Предупредуваме, надлежните од Градот да не бараат оправдувања туку веднаш да дејствуваат, високите температури надвор, најмалку дозволуваат главниот град да биде претрупан со смет. Граѓаните плаќаат комунална такса и сакаат чист град“,
велат од Општина Центар.
Вработените во ЈП „Комунална хигиена“ неколку дена протестираат со барања за повисоки плати и враќање на работа на отпуштените колеги. Директорката Косана Мазнева доцна синоќа со полициска придружба се сретна со дел од вработените од кои побара да го прекинат протестот и да се вратат на работа. Таа кажа дека состојбата е резултат на политички блокади од поединци за кои поднела кривични пријави.
Разговорите меѓу двете страни ќе продолжат во понеделник, а дотогаш нема решение за проблемот со ѓубрето.
ИЗВОР: 360stepeni.mk
