(ФОТО) Првични резулати од референдумот: Швајцарците се изјаснија за нулта емисии гасови до 2050 година

Референдумот за климата беше распишан по кампањата што ја почнаа научниците и еколозите за спас на швајцарските глечери кои се топат со алармантна брзина

Мнозинството Швајцарци денеска на референдум го поддржаа планот за нулта емисии на гасови со ефект на стаклена градина до 2050 година, покажуваат првичните резултати. Конечните резултати ќе бидат објавени во текот на денот.

Поддржувачи на законот за климатски промени во Берн, Швајцарија
фото: EPA-EFE/ALESSANDRO DELLA VALLE

Швајцарците на денешниот референдум одобрија и воведување на данок од 15 проценти за големите компании што се активни на меѓународно ниво.

Законот за климата го поддржале 58,7 отсто од граѓаните, додека повеќе од 79 проценти се изјасниле за новиот данок.

Постери за гласање „против“ нацрт-законот за климатски промени на ѕидот на собирното место на противниците на законот во Берн, Швајцарија
фото: EPA-EFE/PETER KLAUNZER

Референдумот за климата беше распишан по кампањата што ја почнаа научниците и еколозите за спас на швајцарските глечери кои се топат со алармантна брзина.

Поглед на швајцарскиот глечер Алеч во Вале, Швајцарија, (септември 2019 г.) кој е еден од најголемите ледени потоци во Европа и првото светско наследство на УНЕСКО на Алпите. Оваа огромна река од мраз е долга 23 километри од нејзиното формирање во регионот Јунгфрау
фото: EPA-EFE/ANTHONY ANEX

Учесниците на кампањата првично предложија поамбициозни мерки, но подоцна го поддржаа планот на Владата, кој предвидува дека Швајцарија ќе постигне нула емисии до 2050 година.

Глечерите во Швајцарија минатата година доживеаја рекордно топење, губејќи повеќе од шест отсто од својот волумен.