ИСТАНБУЛ (АА) – Турскиот министер за надворешни работи, Хакан Фидан, изјави дека денеска осум земји од групата Д8 во Истанбул ја најавиле својата поддршка за Палестина, која се соочува со израелски напади, јавува Анадолу.
„Не се сомневаме дека оние кои го извршија овој масакр во Газа еден ден ќе бидат повикани на одговорност, и дека ќе победат оние кои се залагаат за мирна иднина на Палестина“, рече Фидан во обраќањето во Истанбул на отворањето на вонредниот состанок на Советот на министри за надворешни работи на Д8.
Тој потсети дека следната недела ќе се одбележи 27-годишнината од основањето на Д8, напоменувајќи дека групата опфаќа држави на три континенти и околу 1,2 милијарди луѓе.
„Денеска, како земји од Д8, Бангладеш, Египет, Индонезија, Иран, Малезија, Нигерија, Пакистан и Туркије, на најсилен можен начин ја објавуваме нашата поддршка за Палестина“, нагласи Фидан.
Тој истакна дека овој вонреден состанок е одржан токму за да се покаже посилна поддршка и солидарност за Палестина.
„На Газа ѝ се потребни надеж и поддршка, но пред сѐ потребна ѝ е акција. Оваа војна не е израелско-палестинска војна, туку предизвик за глобалната демократија“, рече шефот на турската дипломатија.
Фидан нагласи дека меѓународниот систем се руши поради лицемерието и слепилото на некои држави.
Тој истакна дека случувањата во Газа во последните осум месеци покажуваат уривање на нормите и вредностите.
„Продолжувањето на израелскиот масакр предизвикува општествена тензија и гнев кај луѓето. Сѐ додека меѓународниот систем не може да обезбеди решение, на нас како исламски свет ни преостанува да преземеме грижа за овој проблем и да постигнеме трајно решение“, додаде тој.
Извор: Anadolu Agency (AA)
