Евакуирајте се што поскоро – повик од јапонскиот премиер до жителите кои се во опасност од цунами по силниот земјотрес

Според метеоролошката агенција, се верува дека цунами со бранови високи до пет метри ќе стигнат до Ното во префектурата Ишикава

Јапонските власти ги повикаа жителите на неколку крајбрежни области да се евакуираат поради опасност од цунами по серијата земјотреси што се случија во близина на западниот брег на островот Хоншу, од кои најсилниот беше со јачина од 7,6 степени. Сеизмичките служби низ светот утрово регистрираа вкупно 21 земјотрес за еден ипол час, сите со јачина поголема од четири степени. Најсилниот земјотрес бил со длабочина од 13 километри, а епицентарот бил на 90 километри северно од градот Такаока и 47 километри од Анамизу. Во делови од брегот на Јапонското море веќе има бранови високи еден метар.

Според првичните информации за штетите, илјадници луѓе останале без електрична енергија, а железничкиот и воздушниот сообраќај биле прекинати во погодените региони.

Јапонската метеоролошка агенција издаде предупредување за силна сеизмичка активност во следната недела, особено во следните два до три дена, истакнувајќи дека земјата би можело повторно да ја погоди земјотрес со јачина од 7 степени.

Властите се уште ги проценуваат штетите, но жителите мора да се подготват за нови земјотреси, предупреди премиерот Фумио Кишида.

„Жителите мора да останат внимателни поради можноста од последователни потреси. Ги повикувам луѓето во областите каде што се очекува цунами да ги се евакуираат што поскоро“,

рече Кишида.

Според метеоролошката агенција, се верува дека цунами со бранови високи до пет метри ќе стигнат до Ното во префектурата Ишикава.

SON DAKİKA
Japonya’da 7.4 büyüklüğünde deprem meydana geldi.

Meydana gelen depremin ardından tsunami uyarısı yapıldı. pic.twitter.com/9BdAZTiGhF

— Tıklamana Gerek Yok (@tiklamanagerYOK) January 1, 2024

Од жителите на крајбрежната област Ното во префектурата Ишикава беше побарано „веднаш да се евакуираат на повисоките места“, пренесува телевизијата. Јавната телевизија објави „ЕВАКУИРАЈ“ со големи букви повикувајќи ги жителите да бегаат.

Метеоролошката агенција на Јужна Кореја објави дека по земјотресот може да се зголеми нивото на морето во источната провинција Гангвон.

Во областа погодена од земјотресот има нуклеарна централа, соопшти компанијата за електрична енергија на Токио (Tokyo Electric Power Co). Операторот на постројката рече дека проверува дали има проблеми, но засега нема извештаи за некакви неправилности.

На медиумите и на социјалните мрежи се објавија повеќе видеа од куќи како се тресат, жители како се кријат под масите, дури и од уривање на еден објект. Зградите се треселе дури и во главниот град Токио, иако тој се наоѓа на спротивниот брег од островот Хоншу.