Ердоган задоволен: Успешно го организиравме финалето од Лигата на шампиони

Стадионот на кој се одигра синоќешното финале почнал да се гради во 1999 година со цел Турција да се квалификува во трката да биде домаќин на Олимписките игри во 2008 година. Но, тоа беше залудно бидејќи не ѝ беше доделена организацијата на игрите иако во изградбата вложи 350 милиони евра. Тој им беше адут на Турците и во барањата за организација на европските првенства во 2012 и 2016, но ниту нив не ги добија

По синоќешното финале од Лигата на шампионите кое се одигра на стадионот „Ататурк“ во Истанбул, доцна во ноќта се огласи и турскиот претседател Реџеп Таип Ердоган, кој му честиташе на победничкиот тим на Мачестер Сити и оцени дека организацијата од страна на Турција била успешна.

„Му честитам на тимот на Манчестер Сити кој ја освои шампионската титула во финалето од Лигата на шампионите, еден од најголемите спортски настани во светот што се одржа на Олимпискиот стадион ’Ататурк‘ во Истанбул – зеницата во окото на Турција и колевката на цивилизацијата. Би сакал да им се заблагодарам на сите кои уште еднаш го докажаа гостопримството на Турција и придонесоа за непречено и успешно организирање на овој голем настан“,

напиша Ердоган на социјалните мрежи.

Во синоќешното финале на Лигата на шампиони, фудбалерите на Манчестер Сити славеа со 1:0 против Интер.

Олимпискиот стадион „Ататурк“ е импозантен спортски објект со кој располага Турција. Има капацитет од 75 000 гледачи. Првично собирал 80 000, но по три гони тој е намален бидејќи од петте илјади места кои биле скратени не можело да се следи што се случува на теренот.

Стадионот почнал да се гради во 1999 година со цел Турција да се квалификува во трката да биде домаќин на Олимписките игри во 2008 година. Но, тоа беше залудно бидејќи не ѝ беше доделена организацијата на игрите иако во изградбата вложи 350 милиони евра.

Стадионот, кој беше отворен во 2002 година со меч помеѓу грчки Олимпијакос и турски Галатасарај, подоцна им беше адут на Турците во барањето да ги организираат европските фудбалски првенства во 2012 и 2016 година, но ниту нив не успеаја да ги добијат.

Пред вчерашното финале, најважниот спортски настан одржан на овој стадион беше уште едно финале од Лигата на шампиони кога во 2005 се соочија Милан и Ливерпул кога англискиот тим стана европски шампион.