Активирањето на домашните минерални потенцијали е можност за нови инвестиции, работни места, развој на домашните компании и технолошка модернизација на македонското рударство
Светот влегува во нова фаза на развој на рударскиот сектор. Растечката потреба од бакар и други критични минерали, забрзаната енергетска транзиција и стремежот на Европската Унија да ја намали зависноста од ограничен број надворешни добавувачи, особено од Кина, ги ставаат минералните ресурси во центарот на економските и стратешките политики.
Во овие процеси Македонија не смее да стои отстрана. Напротив, треба навреме да ги препознае можностите што ги носи новата глобална економска реалност и да ги стави во функција сопствените минерални потенцијали, со јасна визија за развој на современо, конкурентно и одговорно рударство.
Ова не треба да го правиме само затоа што Европа има потреба од сигурни извори на критични суровини. Пред сè, тоа е можност за развој на домашната економија. Новите рударски инвестиции можат да отворат илјадници директни и индиректни работни места, да создадат долгорочни деловни можности за домашните компании, да поттикнат развој на локалните заедници и да привлечат нови знаења и современи технологии во македонското рударство.
Развојот на нови рударски проекти може да има позитивен ефект врз целата економија – од градежништвото, транспортот и логистиката, до инженерските услуги, одржувањето, производството и други придружни дејности. Тоа значи можност домашните компании да станат дел од пошироките европски синџири на снабдување, а македонските работници и експерти да стекнуваат нови вештини и искуства.
Истовремено, развојот на рударството мора да се темели на највисоки еколошки стандарди и доследна примена на современи технологии. Денес на располагање се технолошки решенија за поефикасно користење на ресурсите, намалување на емисиите и потрошувачката на вода, контрола на влијанијата врз воздухот и почвата, како и соодветно управување со отпадот и рекултивација на просторот. Нивната примена, заедно со континуираниот мониторинг и строгата контрола на исполнувањето на еколошките обврски, е неопходен услов за одговорно рударство.
Нашата порака е дека Македонија има можност да биде дел од овие процеси, наместо повторно да ги пропушти развојните шанси.
Иницијативата „И Здравје и Работа“ смета дека е време Македонија активно да се вклучи во европските и светските процеси за обезбедување критични минерали и развој на современо рударство. Тоа не е избор меѓу економскиот развој и здравата животна средина. Тоа е обврска да се најде одговорен модел во кој и двете цели ќе бидат подеднакво важни – преку знаење, технологија, контрола и почитување на највисоките стандарди.
Македонија не треба да биде само набљудувач на новите економски и технолошки промени. Треба да ги искористи своите потенцијали за да создаде нови работни места, посилна домашна економија и современо рударство, кое ќе ги почитува луѓето и животната средина.
