ИСТАНБУЛ (АА) – Туркије ќе продолжи со својата поддршка за Палестинците пред претстојниот свет муслимански месец Рамазан, со продолжување на активностите како и во изминатите 15 месеци, рече денес турскиот претседател Реџеп Таип Ердоган говорејќи за прекинот на огнот меѓу палестинската група Хамас и Израел, јавува Анадолу.
„Како што стоевме покрај нашите палестински браќа 15 месеци (од израелската геноцидна војна), повторно ќе ги мобилизираме сите наши ресурси пред светиот месец Рамазан“, рече Ердоган на 8-от Редовен Обласен конгрес на АК Партијата во Ескишехир, северозападна Туркије. Рамазан оваа година треба да биде во месец март.
Палестинската група на отпорот Хамас претходно во текот на денот предаде четири израелски војници жени во рамките на договорот за прекин на огнот во Газа и размена на затвореници со Израел.
Првата шестнеделна фаза од договорот за прекин на огнот стапи на сила на 19 јануари, запирајќи ја израелската геноцидна војна во која се убиени речиси 47.300 Палестинци, главно жени и деца, а најмалку 111.470 се повредени од 7 октомври 2023 година досега.
– „Одговорните за пожарот во скијачкиот центар ќе одговараат“ –
Во врска со пожарот во ски-центарот во Болу, северозападна Туркије, кој се случи оваа недела, Ердоган рече дека судовите ќе ги повикаат на одговорност оние кои се одговорни за трагичната загуба на животи.
„Се преземаат сите чекори, без компромиси, за да се осигури дека оние кои ѝ нанесоа голема болка на нашата нација ќе одговараат пред судот“, рече турскиот претседател.
Во пожарот загинаа 78 луѓе, соопшти вчера турското Министерство за правда, откако заврши идентификацијата на сите тела.
Пожарот избувна во вторникот пред зори во ресторанот на хотелот во ски-центар Карталкаја и брзо се прошири низ зградата, изјави гувернерот на градот.
Министерот за правда, Јилмаз Тунч, претходно соопшти дека се спроведува сеопфатна истрага со тим од шест обвинители и петчлена експертска комисија.
Извор: Anadolu Agency (AA)
