ДУБАИ (АА) – Луѓето мораат да престанат да ја доживуваат природата како непријател и потребно е повторно да се воспостави врска со неа, изјави вчера првата дама на Туркије, Емине Ердоган, повикувајќи на правичен акционен план за климата, известува Анадолу.
„Гледаме дека и државите кои никогаш не го изгубиле односот со земјата исто така се соочуваат со кризи за кои не се одговорни. Неизбежно е да се спроведе правичен акционен план за климата за да може да се убедат Африка, Азија и Латинска Америка да се приклучат во универзалната борба“, рече Емине Ердоган на панелот „Климатски разговори за зелена иднина“ одржан во Дубаи, Обединети Арапски Емирати.
Емине Ердоган, сопругата на претседателот на Туркије, Реџеп Таип Ердоган, истакна дека според неа, многу е важно решенијата за еколошките проблеми да се бараат состанувајќи се во различни географски области.
За иницијативата Нулти отпад („Zero Waste“) предложена од страна на Туркије, Емине рече дека проектот е движење кое се потпира врз волонтери.
Во 2017 година, под покровителство на првата дама на Туркије, започнат е проектот Нулти отпад со цел да се истакне значењето на рециклирањето на отпадот во борбата против климатската криза. Во декември минатата година Генералното собрание на ОН едногласно ја усвои резолуцијата за нулти отпад претставена од Туркије, прогласувајќи го 30. март за меѓународен ден на нулти отпад.
„Откако нашиот проект е усвоен на целата планета, стана возможно да се зголеми стапката на рециклирање од 13% на 30%, што на стопанството му донесе 3,5 милијарди долари“, рече Емине Ердоган, додавајќи дека Туркије спречила емисија на 4,9 милиони тони стаклени гасови.
Таа рече дека за доброто на следните генерации, од суштинско значење е луѓето, особено развиените земји, да се откажат од индивидуализмот и заеднички да го штитат светот.
„Со сето срце верувам дека бројката на активни климатски волонтери ширум светот се зголемува. Ќе сториме сѐ нашиот глас да се чуе и нашите конкретни резултати да се зголемат“, рече првата дама на Туркије.
Осврнувајќи се на децата убиени во израелските напади во Појасот Газа, Емине Ердоган истакна:
„Би сакала да кажам дека немаме право на идните генерации да им го оставиме светот извалкан со геноцид.“
„Додека децата се убиваат на секои 10 минути во Газа, дали е можно нашиот повик за меѓународна правда да најде одговор во совеста? Навистина ќе вреди да се спаси светот во кој меѓународното право и човечките вредности важат за целото човештво, без разлика на религијата, јазикот, расата или етничката припадност“, додаде Емине Ердоган, првата дама на Туркије.
