Новата учебна година во Битола ќе започне со значително помал број на првоодделенци. Според податоците од Општина Битола, годинава во училиштата ќе седнат 529 првачиња, што е за 238 помалку од минатата година, кога беа запишани 767 ученици во прво одделение.
Најмал број првачиња се запишани во основните училишта „Александар Турунџев“ во Кукуречани, каде ќе учат само 10 деца, и во „Св. Кирил и Методиј“ во Битола, каде ќе започнат 24 ученици. Најголем број првоодделенци, вкупно 94, ќе ја започнат својата настава во ООУ „Св. Климент Охридски“.
Од секторот за образование при Општина Битола информираат дека трендот на намалување на бројот на првачиња е присутен во сите училишта. Според евиденцијата, во ООУ „Ѓорги Сугарев“ ќе учат 30 првачиња, во „Трифун Пановски“ се запишани 37, во „Коле Канински“ 43, а во „Гоце Делчев“ 45 ученици. Во основното училиште „Крсте Петков Мисирков“ во селото Бистрица, оваа учебна година ќе учат само 30 првоодделенци.
Слична ситуација се бележи и во училиштата „Тодор Ангелески“, „Стив Наумов“, „Елпида Караманди“ и „Даме Груев“, каде исто така се регистрира помал број на запишани ученици во прво одделение.
Намалувањето на бројот на првачиња отвора прашања и предизвици за образовниот систем и локалната самоуправа, особено во контекст на демографските промени и миграцијата.
ИЗВОР: ТВ 21
