Националниот џез-оркестар ќе добие свој траен простор, под објектот на Националната опера и балет(НОБ), кажа денеска министерката за култура Бисера Костадиновска-Стојчевска. За ова трајно решение одлучи Владата на денешната седница. Станува збор за простор од 475 квадратни метри, каде порано имаше дуќан со килими, а е во државна сопственост и во владение на Министерството за култура. Тоа е простор спроти просториите на КУД „Орце Николов“.
Кавгата меѓу Филхармонија и Министерството за култура трае речиси три месеци, откако 108 вработени од оваа музичка институција на 31 март потпишаа петиција против одлуката на Владата и рекоа дека не сакаат да го делат објектот со колегите од Џез оркестарот, иако пола од новиот оркестар се вработени музичари во Филхармонијата. Синдикатот на Филхармонијата, чија директорка е Тина Иванова, организираше протести пред Владата и пред Министерството за култура, а музичарите на концертите во знак на протест носеа жолти, па црвени ленти. Во оваа кампања, музичарите на Филхармонија бараа и оставка од министерката за култура.
„Очекувам јавно извинување од директорката на институцијата и од Синдикатот, кои манипулираа со јавноста и публиката“, кажа министерката.
На нашето прашање дали ќе има одговорност за директорката, рече дека во моментов нема таква одлука.
Костадиновска-Стојчевска рече дека следната недела ќе биде претставено идејното решение за реконструкција на објектот кој ќе го користат џез музичарите и дека формалното формирање на новата институција е во завршна фаза.
„Очекувам од музичарите во Филхармонија да си го исполнат ветувањето и да им дозволат на колегите да одржуваат генерални проби и концерти во салата на Филхармонијата“, рече министерката.
Б. НЕСТОРОСКА
ИЗВОР: sdk.mk
