ИСТАНБУЛ (АА) – Мало девојче почина вчера од глад и дехидрација во градот Хан Јунис, на јужниот дел на Газа, пренесуваат палестинските медиуми, јавува Анадолу.
Тоа починало во болницата за деца и мајки како последица на тешка неисхранетост предизвикана од гладот што владее во регионот поради израелската блокада, јави официјалната палестинска новинска агенција ВАФА, повикувајќи се на медицински извори.
Според медицински лица, илјадници деца во Газа покажуваат симптоми на неисхранетост како резултат на строгата блокада што Израел ја има наметнато за енклавата. Веќе речиси 100 дена се блокирани сите гранични премини, со што е спречен влез на основни потреби, како храна, вода, лекови и гориво.
Басам Закут, директор за медицинска помош во Јужна Газа, изјави дека Газа е „место на смрт“, каде што гладот погоди 100 отсто од населението, пренесе агенцијата.
Министерството за здравство во Газа на 28 мај соопшти дека најмалку 60 деца починале од неисхранетост предизвикана од израелската блокада.
Израел неодамна предложи план за отворање четири пункта за дистрибуција на хуманитарна помош во Јужна и Централна Газа. Според израелските медиуми, овој план има цел да ги натера Палестинците да ја напуштат Северна Газа.
Израелското армиско радио пренесе дека цел на планот е северниот дел на Газа да стане „целосно депопулирана зона“.
Механизмот беше остро осуден од меѓународната заедница и Обединетите нации, кои го сметаат за обид да се заобиколи хуманитарната дистрибуција преку официјалните канали на ОН.
Од 2 март Израел ги држи затворени сите гранични премини, прекинувајќи го влезот на храна, лекови, гориво и други основни резерви за 2,4 милиони жители на Газа.
Израел, отфрлајќи ги меѓународните повици за прекин на огнот, спроведува катастрофална офанзива во Газа од октомври 2023 година, при што се убиени речиси 55.000 Палестинци, повеќето жени и деца.
Хуманитарните агенции предупредија за ризикот од глад кај повеќе од 2 милиона жители на енклавата.
Извор: Anadolu Agency (AA)
