Законот за бранители повторно ја стави на тест претседателката на комисијата за социјална политика Илире Даути која и денеска не можеше да продолжи со работа на комисијата откако опозициската СДСМ не направи отстапки и не дозволи продолжување на работата на комисијата додека пратениците не се изјаснат за потребата од носење на ова законско решение.
Расправата вообичаено почна со барањето на дневен ред да се стави точката по што Даути одби и за кратко време ја прекина седницата.
По прекинување на седницата во изјава за медиумите одговарајќи на новинарски прашања како ја коментира интерпелацијата која Левица ја поднесе против неа рече дека не ја сфаќа лично но и дека доколку пратениците и изгласаат недоверба ова ќе биде прв случај во историјата на Собранието каде се гласа интерпелација на претседател на едно од собраниските тела.
Интерпелацијата за Даути е една од петте кои моментално се поднесени во Собрание, заедно со оние против министерот Меџити, заменик-министерот Исени, министерот Тошковски и министерот Стоилковиќ. Од кабинетот на Гаши пак до сега неколку пати посочија дека тие ќе бидат процесирани согласно законите и деловникот за работа.
Од Алијанса за Албанците на Села пак до сега неколку пати апелираа иницијаторите да ја повлечат интерпелацијата за Даути а пак таа посочи дека поважните законски решенија кои треба да се процесоираат во комисијата со која таа претседава веќе се распоредени и во други комисии за да може да се разгледуваат.
Во законодавниот дом во моментот се блокирани две комисии. Онаа за социјална политика но и онаа за надзор на работењето на АНБ поради немање сертификат на претседателот Реџепи кој претседава со ова тело.
Извор: 24vesti.mk
