Британската влада денеска ќе објави нова дефиниција за екстремизам како одговор на ерупцијата на злосторства од омраза врз Евреите и муслиманите по нападот на Хамас врз Израел на 7 октомври, и покрај предупредувањата дека може да ја загрози слободата на говорот.
Новата дефиниција наведува дека екстремизмот е „промоција или унапредување на идеологија заснована на насилство, омраза или нетолеранција“, чија цел е уништување на основните права и слободи, како и поткопување на либералната парламентарна демократија во Обединетото Кралство.
На тоа му претходеше обраќањето на премиерот Риши Сунак до нацијата по пропалестинските протести во Лондон, каде имаше уапсени поради антисемитизам, како и изолирани инциденти на насилство.
Сунак рече дека британската мултиетничка демократија намерно се поткопува и од исламистичките и од крајно десничарските екстремисти и дека треба да се направи повеќе за да се реши проблемот.
Антисемитските инциденти се зголемени за 147 отсто во 2023 година и достигнаа рекордни нивоа, поттикнати од нападите на 7 октомври, според Community Security Trust, добротворна организација што ги штити еврејските заедници во Обединетото Кралство.
Тел Мама, група која ги следи антимуслиманските инциденти, минатиот месец објави дека злосторствата од омраза врз муслиманите исто така се зголемиле за 335 отсто од нападите минатиот октомври.
„Денешните мерки ќе обезбедат владата ненамерно да не обезбеди платформа за оние кои имаат намера да ја поткопаат демократијата и да им ги ускратат на другите луѓе нивните основни права“, рече Мајкл Гов, министер за заедниците, кој го предводеше процесот на развивање на новата дефиниција за екстремизам.
„Ова е прва од серијата мерки за борба против екстремизмот и заштита на нашата демократија“, рече тој.
Велика Британија веќе забранува групи за кои смета дека се вклучени во тероризам, а поддршката или членството на овие организации е кривично дело. Милитантната палестинска група Хамас е меѓу 80-те забранети меѓународни организации.
Извор: 24vesti.mk
