БАКУ (АА) – Азербејџанската армија презеде контрола на над 90 воени позиции за време на антитерористичките мерки против ерменските сили во Карабах, изјави портпаролот на Министерството за одбрана, јавува Анадолу.
Според информациите во овој момент, повеќе од 90 борбени позиции на ерменските вооружени сили и многу стратегиски важни ридови се преземени под контрола од нивните вооружени сили, рече Анар Ејвазов на прес-конференција во Баку.
Истовремено, тој изјави дека се запленети седум воени возила, минофрлачи, еден тенк, две борбени возила на пешадијата и поголемо количество оружје и муниција на спротивната страна.
Портпаролот сподели и некои детали за антитерористичките активности на азербејџанската армија во регионот, кои завршиле со предавање на ерменските војници. Тој нагласи дека ерменските сили, на кои им снемало муниција, ги напуштиле позициите и побегнале.
Тој истакна дека азербејџанската армија не отворила оган врз тие што бегале.
Вчера Азербејџан најави спроведување на антитерористички мерки во Карабах, со цел да се поддржат одредбите наведени во трилатералниот мировен договор со Русија и Ерменија за ставање крај на конфликтот во 2020 година.
Меѓутоа, претходно денес Баку објави дека е постигнат договор за суспендирање на мерките од 13:00 часот по локално време.
Тензиите меѓу Азербејџан и Ерменија започнаа во 1991 година кога ерменската војска го окупира Карабах, територија меѓународно призната како дел од Азербејџан и уште седум соседни региони.
Есента 2020 година Азербејџан ослободи неколку градови, села и населби од ерменската окупација во текот на 44-дневните судири. Војната заврши со прекин на огнот со посредство на Русија.
Тензиите меѓу двете земји, сепак, продолжија и покрај тековните разговори за долгорочен мировен договор.
