Главниот државен ревизор, Максим Ацевски во емисијата „Бизнис21“ на ТВ21 испрати јасна порака дека корупцијата не ја зафаќа целата држава, но постојат сериозни проблеми кои бараат системско и навремено дејствување.
Според него, државата треба да вложува повеќе во превенцијата.
„Не сметам дека не треба да има репресивни мерки, меѓутоа сметам дека државата треба да вложува повеќе во превенцијата. Не треба да дозволиме нешто да се случи, откако ќе се случи веќе е настаната штетата“, истакна Ацевски.
Тој истакна дека годишниот извештај на Државниот завод за ревизија за 2023 покажува значајни износи што се однесуваат на несоодветно користење на јавни средства – пари што потекнуваат од даночните обврзници.
„Дали е тоа добро? Не е добро, секако дека тоа не чини. Во суштина, тоа се изгубени јавни средства, средства на даночните обврзници, а од друга страна квалитет на услугите на граѓаните“, додаде тој.
ИЗВОР: ТВ 21
