Градоначалничката на Скопје, Данела Арсовска, реагираше на повикот од премиерот Христијан Мицкоски да преземе мерки против дивоградба во скопската општина Чаир, посочувајќи дека Градот Скопје нема законска надлежност да постапува во такви случаи.
„Жалам што првиот човек на Владата сѐ уште не ги познава законите и нема основни сознанија за функционирањето на локалната самоуправа“, изјави Арсовска преку објава на Facebook.
Таа појасни дека за дивоградбите се надлежни општинските градежни инспектори, а не Градот Скопје, кој, според неа, единствено нема свој градежен инспекторат по закон.
„Надлежност за постапување има Општина Чаир преку својот градежен инспектор, а дополнително и Државниот градежен инспекторат кој е под Министерството за транспорт и врски“, наведе таа.
Арсовска потенцираше дека во случаи на бесправна градба и узурпација на државно земјиште, одговорноста ја има Министерството за внатрешни работи.
„Благодарам на можноста да делувам едукативно, и апелирам – сега кога ги знаете надлежностите, постапете веднаш“, му порача Арсовска на премиерот.
ИЗВОР: racin.mk
