Од вкупно околу 15 активни пожари на отворено низ земјата, најсериозни остануваат три – во атарот на село Николиќ (општина Дојран), кај Крушје (во близина на Велес), и кај село Локвица (општина Македонски Брод). Најтешки за ставање под контрола, според надлежните, се токму пожарите кај Крушје и Локвица, кои избувнаа во текот на денешниот ден.
Директорот на Дирекцијата за заштита и спасување (ДЗС), Стојанче Ангелов, информираше попладнево дека на терен се ангажирани повеќе служби и ресурси, вклучувајќи ер-трактори, хеликоптери, локални и државни пожарникарски екипи, како и припадници на армијата.
„Пожарот во село Николиќ трае веќе повеќе од една недела. Утрово таму интервенираа екипи на Национални шуми, поддржани од пожарникари од Валандово, Гевгелија и доброволци од Дојран. Дополнително, ДЗС и Единицата за брзо распоредување (ЕБР) со специјализирана механизација се вклучени во справувањето,“ изјави Ангелов.
Во гаснењето се користи ер-трактор од типот „амфибија“ со капацитет од три тони вода, кој црпи вода директно од Дојранското Езеро. Според Ангелов, ваквиот начин на работа овозможува висока прецизност и брза реакција.
„Од неодамна, дополнителна поддршка дава и голем армиски хеликоптер со ведро од три тона, што значително ја зголемува ефикасноста на интервенциите од воздух“, додаде директорот на ДЗС.
Надлежните апелираат до граѓаните да бидат крајно внимателни и да не придонесуваат за нови извори на пожар, имајќи ја предвид високата температура и ризикот од брзо ширење.
ИЗВОР: racin.mk
