Македонија си постави амбициозна цел – до крајот на 2027 година да биде целосно интероперабилна со европскиот дигитален паричник. Министерот за дигитална трансформација, Стефан Андоновски, во гостувањето во емисијата „Топ Тема“ на Телма, истакна дека фокусот е ставен на олеснување на секојдневието на граѓаните преку дигитализација на личните документи и воведување на електронски потпис.
Според министерот, веќе е поставена законската основа за овој процес преку измените во Законот за електронска идентификација и доверливи услуги.
„За прв пат утврдивме што е тоа дигитален паричник. Таму стојат информациите дека и личната карта, и возачката дозвола, дипломите, потврдите и изводите во електронска форма се признаени. Наша обврска е до крајот на 2027 година да бидеме целосно поврзани со европскиот систем“, изјави Андоновски.
Тој најави дека следната надградба на апликацијата ќе вклучува и електронски потпис, што ќе овозможи граѓаните да завршуваат голем дел од административните обврски без физичко присуство на шалтерите.
Иако законската рамка постои, министерот признава дека најголемиот предизвик не е технологијата, туку отпорот кај администрацијата и „традиционалниот“ начин на работа.
„Проблемот не е технички, туку човечки. Најчесто потекнува од вработените во администрацијата. Имаме менталитет кој вели: ‘Ние сега ќе се дигитализираме, ама кажете им на луѓето пак на хартија да ни ги носат податоците’. Тоа е култура на ‘си работевме вака досега, зошто да менуваме’“, дециден е министерот.
Тој додава дека е потребно т.н. „change management“ или управување со промени за да се надмине овој внатрешен отпор во институциите.
Во моментов, на националниот портал се достапни 326 услуги, што е значителен скок во однос на претходните години, но амбициите се поголеми.
„Наша обврска е до јуни следната година да стигнеме до 400 услуги на порталот. Системите постојат, не треба да се измислува топла вода или да се плаќаат надворешни компании. Потребна е само желба и дедицирани ресурси од секоја институција поединечно“, истакна Андоновски.
Министерот упати повик до сите институции да одредат буџет и луѓе кои ќе го истуркаат овој процес до крај, нагласувајќи дека Министерството за дигитална трансформација ги става на располагање сите свои ресурси за да се постигне крајната цел – модерна и дигитализирана Македонија.
Извор: zurnal.mk
