ВАШИНГТОН (АА) – Американскиот претседател Доналд Трамп денес побара Русија „да постигне договор сега“ и да стави крај на војната во Украина, а во спротивно предупреди на високи даноци, царини и санкции за рускиот извоз доколку наскоро не се постигне решение, пренесува Анадолу.
„Не сакам да ја повредам Русија. Го сакам рускиот народ и отсекогаш сум имал многу добар однос со претседателот Путин. Не смееме никогаш да заборавиме дека Русија ни помогна во Втората светска војна губејќи речиси 60.000.000 животи во тој процес“, напиша Трамп на „Truth Social“.
„По сето што е кажано, ќе им направам многу голема услуга на Русија чија економија пропаѓа и на претседателот Путин. Постигнете договор сега и ЗАПРЕТЕ ја оваа бесмислена војна! САМО ЌЕ СТАНЕ УШТЕ ПОЛОШО. Ако не се склучи ‘договор’ и тоа брзо, немам друг избор освен да ставам високи даноци, тарифи и санкции за сè што Русија им продава на Соединетите Американски Држави и другите земји. Да ставиме крај на оваа војна, која никогаш немаше да почне ако бев претседател: Можеме да го сториме тоа на полесен начин или на потежок начин – а секогаш е подобар полесниот начин. ВРЕМЕ Е ЗА ДОГОВОР, ДОСТА СЕ ГУБЕА ЖИВОТИ“, додаде тој.
Ова е објавено еден ден откако американскиот претседател посочи дека дополнителни санкции кон Русија се „веројатни“ доколку рускиот претседател Владимир Путин не седне на преговарачка маса за да стави крај на војната во Украина.
Новинарите во Белата куќа го прашаа Трамп дали ќе воведе дополнителни санкции за Москва доколку Путин одбие да се вклучи во мировни преговори.
„Звучи веројатно“, рече тој, без да образложи.
Прашан дали смета дека војната треба веднаш да запре, тој одговори: „Војната никогаш не требаше да почне. Ако имавте компетентен претседател, што го немавте, војната немаше да се случи. Ако јас бев претседател, војната во Украина немаше да се случи.“
Тој го критикуваше поранешниот претседател Џо Бајден велејќи дека Путин „не го почитувал“ неговото водство.
За тоа дали ќе продолжи да праќа оружје во Украина, Трамп рече дека неговата администрација „ќе го разгледа тоа“ и додаде: „Разговараме со (украинскиот претседател Владимир) Зеленски. Многу скоро ќе разговараме и со претседателот Путин и ќе видиме што и како сето тоа ќе се случи.“
„Едно нешто што чувствувам е дека Европската Унија треба да плаќа многу повеќе отколку што плаќаат тие“, додаде тој.
Трамп вети дека ќе стави крај на војната во Украина и рече дека ќе разговара со Путин и Зеленски, иако не даде временска рамка или конкретни детали.
„Претседателот Зеленски би сакал да има мир. Тој ми го кажа тоа многу јасно. Но за танго потребни се двајца“, им рече тој на новинарите.
Прашан кога ќе се сретне со Путин, Трамп рече: „Кога и да посакаат, јас ќе се сретнам.“
„Милиони луѓе се убиени. Тоа е злобна ситуација“, рече тој, обвинувајќи ги САД за неточно пријавување на бројот на загинати.
„Вистинското убивање сега е на воениот фронт. Тоа е многу рамничарска земја и единствено нешто што го спречува куршумот е нечие тело, а имате млади војници. Значи, Русија сега изгуби околу 800.000 војници. Украина изгуби околу 600.000 или 700.000. Мислам дека бројките се помали“, додаде тој.
Извор: Anadolu Agency (AA)
